ဝါဆိုလပြည့်နေ့ မွန်းလွဲပိုင်းက မကွေးတိုင်း ချောက်မြို့နှင့် စလေမြို့အကြားရှိ စက်မှုဝန်ကြီး
ဋ္ဌာနပိုင် အိမ်သုံးပစ္စည်းစက်ရုံ မှ ဓါတုပစ္စည်း ပေါက်ကွဲမီးလောင်ကျွမ်းခဲ့ရခြင်းမှာ တရုတ် ကုမ္ပဏီမှ တည်ဆောက်သည့် စက်ရုံ၏ နည်းပညာဆိုင်ရာ အားနည်းမှုကြောင့် ဟု စက်ရုံမှူးက သုံးသပ်ပြောဆိုသည်။
စက်ရုံတွင် ကွန်ပျူတာစနစ်နှင့် လူကိုယ်တိုင် ကိုင်တွယ် ဆောင်ရွက်ရသည့် (Manual) ဖြင့်လုပ်ဆောင်ရသည့် စနစ် ၂ မျိုးရောနှောနေကာ ဗား(valve) အဖွဲ့အပိတ်ကဲ့သို့သော လုပ်ဆောင်မှုမျိုးကို လူကိုယ်တိုင် ဆောင်ရွက်ရသည်ဟု ၎င်းကပြောသည်။
ကွန်ပျူတာနှင့် အလိုအလျှောက်ထိန်းချုပ်သည့် စနစ်နှင့် လူကိုယ်တိုင် ဆောင်ရွက်ရသည့် စနစ်နှစ်မျိုးကြောင့် ယခုလို မတော်တဆအဖြစ် ဖြစ်ပွားခဲ့ခြင်းဖြစ်သည်ဟု ၎င်းအနေဖြင့် မှတ်ချက်ချ ပြောဆိုသည်။
သြဂုတ်လ ၂ ရက်နေ့က စက်ရုံမီးလောင်မှု ကို ငြိမ်းသတ်နေစဉ်။
အခင်းဖြစ်ပွားစဉ်နေ့က ဗား ချို့ယွင်းကာ ဓါတုအရည်များ ဖိတ်လျှံလာပြီး ယင်းအရည်များက လေနှင့်ထိတွေ့ကာ မီးလောင်မှု စတင်ခဲ့ခြင်းဖြစ်သည်ဟုလည်း စက်ရုံမှူးက ပြောသည်။
“အဲဒီနေ့ နေ့လည် ၁နာရီဝန်းကျင်က ကျွန်တော်အိမ်မှာရှိနေတုန်း စက်ရုံထဲက စက်ပုံမှန် မဟုတ်တဲ့ အသံထွက်လာတယ်၊ ဘာဖြစ်တာလဲလို့ သွားကြည့်တော့ ဒုတိယထပ် တာဝါတိုင်က ဓါတုအရည် လျှံကျနေတာတွေ့တယ်၊ အဲနောက် မကြာခင် အသေးစားပေါက်ကွဲမှု တခုဖြစ်တာပဲ” ဟု ယင်းနေ့အဖြစ်အပျက်နှင့် ပတ်သက်၍ စက်ရုံမှူးက ရှင်းပြသည်။
အသေးစားပေါက်ကွဲမှု မှထွက်လာသည့် အပူနှင့် မီးတောက်ကြောင့် နောက်ထပ်ပေါက်ကွဲမှုကြီး ဖြစ်ပွားရခြင်းဖြစ်သည်ဟုလည်း သိရှိရသည်။ ပထမ အသေးစားပေါက်ကွဲမှုဖြစ်ပွားလိုက်ခြင်းက စက်ရုံဝန်ထမ်းများကို စက်ရုံမှ ဝေးရာသို့ တိမ်းရှောင်ခဲ့သဖြင့် နောက်ဆက်တွဲ ပေါက်ကွဲမှုတွင် ဒဏ်ရာရမှု နည်းပါးခဲ့ခြင်းဖြစ်သည်ဟု စက်ရုံဝန်ထမ်းများ၏ ပြောဆိုချက် အရသိရှိရသည်။
သြဂုတ်လ ၂ ရက်နေ့ ပေါက်ကွဲမှုကြောင့် စုစုပေါင်း ၇ ဦးဒဏ်ရာရခဲ့ကာ တဦးမှာ နောက်ကျော မီးလောင်ဒဏ်ရာ ပြင်းထန်သဖြင့် ချောက်ဆေးရုံတွင် ကုသမှု ခံယူနေကြောင်း၊ အခြားဒဏ်ရာရသူများမှာ မျက်စေ့ထဲသို့ ဓါတုဆေးရည် ၀င်သဖြင့် မျက်လုံးစပ်သည့် ဒဏ်ခံစားနေရကြောင်း စက်ရုံဝန်ထမ်းများက ပြောဆိုသည်။
ရေနံချောင်းမြို့မှ စက်ရုံဝန်ထမ်းတဦးဖြစ်သူ ကိုမင်းမင်းထွန်းမှာလည်း မျက်စေ့ ဒဏ်ရာရသဖြင့် ၎င်းနေထိုင်ရာမြို့သို့ ပြန်လာပြီး မျက်စေ့အထူးကု ဆရာဝန်ဖြင့် ပြသလျှက်ရှိသည်ဟု ကိုမင်းမင်းထွန်း၏ ပြောဆိုချက်အရ သိရသည်။
ယင်းစက်ရုံကို ၂၀၀၅ ခုနှစ်တွင် တရုတ်ကုမ္ပဏီ CMCEC က တည်ဆောက်ခဲ့ပြီး ၂၀၀၆ ခုနှစ်တွင် ပြီးစီးဖွင့်လှစ်ခဲ့ခြင်းဖြစ်သည်။ ယခုလက်ရှိ ၀န်ထမ်းအင်အား ၁၈၀ ဖြင့်လည်ပတ်လျှက်ရှိကြောင်းလည်း သိရှိရသည်။
ယင်းပေါက်ကွဲမှု ဖြစ်ပွားသည့်နေ့က စက်မှုဝန်ကြီးဋ္ဌာန ပြည်ထောင်စု ဒုဝန်ကြီး နှင့် ကျောက်ပန်းတောင်း တပ်နယ်မှ တပ်နယ်မှူး ဗိုလ်မှူးချုပ်သိန်းဝင်း လာရောက်ခဲ့ကာ နောက်တရက်တွင် စက်မှုဝန်ကြီးဋ္ဌာန ပြည်ထောင်စု ၀န်ကြီးဦးစိုးသိန်းနှင့် မကွေးတိုင်းဒေသကြီး ၀န်ကြီးချုပ် ဦးဘုန်းမော်ရွှေ တို့လာရောက်ခဲ့သည်။
ပျက်စီးဆုံးရှုံးမှု တန်ဖိုး မသိရှိရသေးသော်လည်း စက်ရုံတခုလုံး မီးကျွမ်းလျှက်ရှိသည်ကို တွေ့မြင်ရသည်။
မီးလောင်ကျွမ်းနေသည့် ဟိုင်ဒြိုဂျင် ပါရောက်ဆိုဒ် စက်ရုံ
By Yangon Press International
ပေါက်ကွဲမှု အရှိန်ကြောင့် စက်ရုံမှန်များနှင့် နံရံကြွေပြားများ ကွဲအက် ပျက်စီးခဲ့သည်။
No comments:
Post a Comment