ပြန်ကြားရေး ၀န်ကြီးဌာနက ပြည်တွင်းရှိ ပုဂ္ဂလိက မီဒီယာများအပေါ် ဆက်တိုက် ဖိနှိပ်အရေး ယူမှုများ ပြုလုပ်လာသဖြင့် သတင်းလွတ် လပ်ခွင့်များ ရရှိရေး တောင်းဆိုရန် ဖွဲ့စည်းလိုက်သည့် သတင်းလွတ်လပ် ခွင့်ကော်မတီ (ယာယီ)၏ တောင်းဆိုချက်များအပေါ် အရေးယူဆောင် ရွက်ပေးရန် လက်မှတ်ရေးထိုး လှုပ်ရှားမှုတစ်ရပ် ယနေ့စတင် လုပ်ဆောင် မည်ဖြစ်ကြောင်း ယင်းကော်မတီ ထံမှသိရသည်။“ကျွန်တော်တို့ရဲ့ တောင်းဆိုချက်တွေကို နိုင်ငံတော်သမ္မတကြီးနဲ့ ပြည်သူ့ လွှတ်တော်ဥက္ကဌကြီး ထံကို အဓိကထားပေးပို့သွားဖို့ ရှိပါတယ်။ ဒီလိုပေးပို့ရာမှာ ဒီတောင်းဆိုချက်တွေကို အားလုံးကဆန္ဒရှိကြောင်း သိစေဖို့ လက်မှတ်တွေစုဆောင်းတဲ့လှုပ်ရှားမှုကို စလုပ်တာပါ”ဟု ယင်းကော်မတီ၏ ပြန်ကြားရေးတာဝန်ခံ တစ်ဦးကဆိုသည်။
အဆိုပါကော်မတီ၏ တောင်းဆိုချက်များ ရရှိရေးအတွက် လှုပ်ရှားမှုများ အဆငိ့လိုက် ဆက်လက်လုပ်ဆောင်သွားရန်ရှိကြောင်းလည်း ၎င်းကရှင်းပြသည်။
ကော်မတီအနေနှင့် အစိုးရ၏ ဒီမိုကရေစီဖော်ဆောင်ရေး လုပ်ငန်းစဉ်များကို လုံးဝ ထောက်ခံယုံကြည်ပါကြောင်း၊ သို့သော် ပြန်ကြားရေးဝန်ကြီးဌာန၏ ယခုလုပ်ရပ်မှာ ဒီမိုကရေစီဖော်ဆောင်နေသော အစိုးရအဖွဲ့ အပေါ် ပြည်သူလူထု၏ ယုံကြည်မှုလျော့နည်းစေသောလုပ်ဆောင် ချက်ဖြစ်ပြီး ယနေ့ကာလတွင် မပြုသင့်သောပြုမူချက်ဖြစ်ကြောင်း၊ ယင်းလုပ်ရပ်ကို အစိုးရအဖွဲ့က တာဝန်ယူဖြေရှင်းပေးသင့်ကြောင်း ၎င်းက ဆက်လက်ပြောကြားသည်။
သတင်းလွတ်လပ်ခွင့်ကော်မတီ(ယာယီ)၏ ထုတ်ပြန်ကြေညာချက်
ရက်စွဲ- ၁.၈.၂၀၁၂
၁။ ပိတ်ပင်ခံထားရသောThe Voice Weekly , Envoy ၊ လျှပ်တပြက်ဂျာနယ်တို့ကိုချက်ချင်းထုတ်ဝေခွင့်ပေးရန်။
၂။ ပြုပြင်ပြောင်းလဲမှုများကို ထိခိုက်စေသည့်နောက်ပြန်ဆွဲသော မည်သည့်ပုဂ္ဂိုလ်၊ မည်သည့်လုပ်ရပ်မျိုးကိုမဆိုအရေးယူဖယ်ရှားပေးရန်။
၃။ ၁၉၆၂ ခုနှစ် ပုံနှိပ်အက်ဥပဒေနှင့်မီဒီယာများကိုဖိနှိပ် ကန့်သတ်ထားသောဥပဒေများကိုချက်ချင်းဖျက်သိမ်းပေးရန်။
၎။ သတင်းမီယာများအပေါ် အရေးယူမှုများကိုထပ်မံလုပ်ဆောင်ခြင်းမပြုရန်။
၅။ ကျင့်ဝတ်နှင့်အညီရေးသားဖော်ထုတ်သော မည်သည့်ရေးသားမှုကို အစိုးရကဥပဒေကြောင်းအရတရားစွဲမှုများကိုချက်ချင်းရပ်ဆိုင်းရန်။
၆။ မီဒီယာသမားများသဘောဆန္ဒမပါဝင်ဘဲရေးဆွဲထားသည့် မည်သည့်မီဒီယာဥပဒေကိုမဆိုလက်မခံပါ။
၇။ လတ်တလောဖြစ်ပွားနေသောစာပေလွတ်လပ်ခွင့်ဆုံးရှုံးမှုများအတွက် မီဒီယာသမားများအား နိုင်ငံတော်၏ တာဝန်အရှိဆုံးပုဂ္ဂိုလ်ကအမြန်ဆုံးတွေ့ဆုံဖြေရှင်းပေးရန်။
The Voice Weekly
No comments:
Post a Comment