နယ်ပယ်အသီးသီးမှ ပညာရှင်များက လက်ပံတောင်းတောင် ကြေးနီစီမံကိန်း ရပ်ဆိုင်းရန် တညီတညွတ်တည်း တောင်းဆို

စက်တင်ဘာလ ၃၀ ရက်။ ။ ဒီကနေ့ နံနက်ပိုင်းက ရန်ကုန်မြို့၊ ဗဟန်းမြို့နယ်မှာ ရှိတဲ့ တော်ဝင်နှင်းဆီ စားသောက်ဆိုင်မှာ လက်ပံတောင်းတောင်နဲ့ ချင်းတွင်းအလှ သဘာဝ နှီးနှောဖလှယ်ပွဲ ကျင်းပပြုလုပ်ခဲ့ရာမှာ သံဃာတော်များ၊ လွှတ်တော်
ကိုယ်စားလှယ်ကြီးများ၊ သဘာဝ ပတ်ဝန်းကျင်ဆိုင်ရာ ပညာရှင်များ၊ တရားရေးနယ်ပယ်မှ ထင်ရှားသူများ၊ နိုင်ငံရေးပါတီများမှ လူပုဂ္ဂိုလ်များ၊ အရပ်ဘက် လူမှုအဖွဲ့အစည်း အသီးသီးမှ လူပုဂ္ဂိုလ်များ၊ နိုင်ငံကျော် အနုပညာရှင်များ၊ လက်ပံတောင်းတောင် စီမံကိန်းဒေသမှ ဒေသခံများနဲ့ စိတ်ပါဝင်စားသူများ သတင်းမီဒီယာများ တက်ရောက်ခဲ့ကြပါတယ်။

အဲဒီ ဆွေးနွေး နှီးနှောဖလှယ်ပွဲကို တက်ရောက်လာကြတဲ့ ပညာရှင်များနဲ့ နယ်ပယ်အသီးသီးက လူပုဂ္ဂိုလ်များဟာ လက်ရှိဖြစ်ပွားနေတဲ့ လက်ပံတောင်းတောင် စီမံကိန်းနဲ့ ပတ်သက်ပြီး ပေါ်ပေါက်နေတဲ့ ပြဿနာများဟာ နိုင်ငံတော်အတွင်းမှာ တရားဥပဒေစိုးမိုးမှု အားနည်းနေတာကြောင့်သာ ဖြစ်ကြောင်း အဆိုပါ စီမံကိန်းကြီးတွေကို လုပ်ဆောင်ရာမှာ ဖြစ်ပေါ်လာမယ့် နောက်ဆက်တွဲ ပြဿနာတွေကို ထည့်သွင်း စဉ်းစားခြင်းမပြုဘဲ ကိုယ်ကျိုးစီးပွားအတွက် လုပ်ဆောင်ကြတာကြောင့် ဖြစ်ပွားရခြင်း ဖြစ်ကြောင်းတို့ကို ဥပဒေရေးရာ အချက်အလက်များ သဘာဝ ပတ်ဝန်းကျင်ဆိုင်ရာ အချက်အလက်များ ထောက်ပြပြီး ဝေဖန် ပြောဆိုခဲ့ကြပါတယ်။

ယင်းလက်ပံတောင်းတောင် ကြေးနီစီမံကိန်း အနီးရှိ ဒေသခံတောင်သူများကလည်း ၎င်းတို့အနေဖြင့် လက်ရှိအချိန်တွင် လူမှုရေး၊ ကျန်းမာရေး၊ ဘာသာရေး၊ ပညာရေးနှင့် စားဝတ်နေရေး ဆိုင်ရာတို့တွင် အခွင့်အရေးများ ဆုံးရှုံးနေရမှုနှင့် အာဏာပိုင်အဖွဲ့တို့မှ ဒေသခံ ပြည်သူများထက် အဆိုပါစီမံကိန်း ဆောင်ရွက်နေသော ပြည်တွင်းကုမ္ပဏီနှင့် တရုတ်ကုမ္ပဏီတို့ အပေါ်တွင်သာ အကူအညီ အကာအကွယ် ပေးနေမှုများနှင့် ပတ်သက်၍ များစွာ ဝမ်းနည်းရကြောင်း၊ ၎င်းတို့ ဒေသခံများဘက်မှ ယခုကဲ့သို့ ရပ်တည်ပေးခဲ့ကြသူ အားလုံးကို အထူး ကျေးဇူးတင်ရှိပါကြောင်း ပြောပြခဲ့ပြီး၊ မုံရွာမြို့က ကဗျာဆရာကြီး ဦးအံ့မောင်က "ကျွန်တော်တို့ဒေသမှာ ရှိတဲ့ လက်ပန်းတောင်း တောင်ကြီးကို အတင်းအဓမ္မ ဖြိုဖျက်နေတာကို ကျွန်တော်တို့ နယ်တစ်ခုတည်းရဲ့ အားနဲ့ ခုခံရင် အားနည်းနေပါလိမ့်မယ်။ အခု ဒီလုပ်ကြံမှုကြီးကို ခုခံဖို့ တစ်နိုင်ငံလုံးမှာရှိတဲ့ ပြည်သူတွေရဲ့ အင်အားတွေ လက်တွေ ဝိုင်းဝန်းလာကြတာ မြင်တော့ ကျွန်တော် အားတက်ပြီးတော့ ကျေးဇူးလည်း တင်ပါတယ်။ ကျွန်တောတို့ အခုတောင်းဆို ဆန္ဒပြကြတာဟာ ယာမြေတွေ ထိခိုက် နစ်နာတဲ့အတွက် လျော်ကြေးတောင်းတာ မဟုတ်ပါဘူး။ ရွာတွေ ထိခိုက်နစ်နာတဲ့အတွက် လျော်ကြေးတောင်းတာ မဟုတ်ပါဘူး။ ဒီကြေးနီလုပ်ငန်းကြီးဟာ ပြည်သူပြည်သားတွေကို ထိခိုက် ဆုံးရှုံးနေသည့် ဒီဒေသနဲ့တကွ နိုင်ငံတော်ကြီး တစ်ခုလုံးအတွက် အစားထိုးလို့မရတဲ့ ပြင်မရတဲ့ အဆုံးရှုံးကြီးတွေ ဖြစ်မှာကြောင့် ဒီကြေးနီလုပ်ငန်းကြီးကို အပြီးအပိုင် ဖျက်သိမ်းပေးပါလို့ တောင်းဆိုရခြင်း ဖြစ်ပါတယ်" ဟု ပြောပြသွားခဲ့ပါတယ်။

ရတနာပုံသတင်း

By Aye Chan Mon