ဒီအလှူငွေပမာဏဟာ ဒေါ်လာ ခြောက်သောင်းခွဲ သို့မဟုတ် ကျပ်သိန်း ငါးရာ့ငါးဆယ် ၀န်းကျင်နဲ့ ညီမျှတာပါ။
ဒီအလှူကို ဒေသခံ တရုတ်ကုန်သည်ကြီးများ စုပေါင်း ဖွဲ့စည်းထားတဲ့ မဲဆောက် စုပေါင်းကုသိုလ်ပြုဖောင်ဒေးရှင်းက စီစဉ်တာ ဖြစ်ပါတယ်။
လူတဦးအတွက်ပေးတဲ့ အထုပ်ထဲမှာ ဆန် ၅ ကီလို၊ ခေါက်ဆွဲခြောက်၊ ငါးသေတ္တာ၊ ငါးပိဘူးနဲ့ ပိတ်စတွေ ပါပြီး တထုပ်ကို တန်ဘိုးဘတ် ၂၀၀ ခန့် ရှိတယ် လို့ အလှူရှင်အဖွဲ့ရဲ့ ဥက္ကဋ္ဌ နိုင်ဆူချတ်တီရပ်ဝပ်ထနာက သတင်းထောက်တွေကို ပြောပါတယ်။
ဥက္ကဋ္ဌပြောတာက ”ဒီလမှာ တရုတ်လူမျိုးတွေက ကွယ်လွန်သွားပြီးဖြစ်တဲ့ မိဘဆွေမျိုးသားချင်းတွေနဲ့ ဆွေမျိုးမဲ့သူတို့ရဲ့ ၀ိဉာဉ်တွေကို လွတ်ရာ လွတ်ကြောင်း အတွက် အလှူဒါနပြုကြတာဖြစ်တယ်၊ အယုတ်အလတ် အမြတ် မရွေးပါဘူး။ နှစ်စဉ် အများစုလာတာကတော့ မြန်မာတွေဖြစ်တယ်” လို့ ဆိုပါတယ်။
ဒီနေ့ပြုလုပ်တဲ့အလှူပွဲဟာ ၄၃ ကြိမ်မြောက်ဖြစ်တယ် လို့ ဥက္ကဋ္ဌက ပြောပါတယ်။
အလှူပွဲကိုလာတဲ့ မြန်မာတွေထဲက ထက်ဝက်လောက်ဟာ ကလေးငယ်တွေဖြစ်ကြပြီး တချို့ဆိုရင် ကျောင်းဖျက်ပြီး လာကြတဲ့ ကလေးတွေဖြစ်တယ်။ ကလေးတွေ ပြောတာက မိဘတွေနဲ့ လိုက်လာတာဖြစ်ပြီး မောင်နှမ များတဲ့ မိသားစုတွေအတွက် တွက်ချေကိုက်တယ်လို့ ပြောပါတယ်။
မဲဆောက်မြို့ဆာသူးလေ မြန်မာရွှေ့ပြောင်းအထက်တန်းကျောင်းက ဆရာမတဦးက ”ဒီနေ့ အတန်းထဲကကျောင်းသားတွေ အတော်လေး လျော့နေတယ်။ နောက်မှ သိရတာက ဆန်လှူပွဲသွားကြတယ်လေ။ အခြားကျောင်းတွေမှာလည်း ဒီလိုဘဲ” လို့ အဲဒီ ဆရာမက ပြောပါတယ်။
ဒီနှစ်မှာ ဆန်လှူပွဲလာတဲ့လူတွေ နည်းသွားပြီး အရင်နှစ်တွေကဆိုရင် လူ နှစ်သောင်းနီးပါးလောက် လာတယ်၊ ဆန်လှူပွဲ လာတဲ့လူတွေကို (နေထိုင်ခွင့် သွားလာခွင့် လက်မှတ် မပြနိုင်ရင်တောင်) ဖမ်းတာဆီးတာတွေ မလုပ်ကြဖို့ မဲဆောက်ရဲ၊ စစ်တပ်နဲ့ ထိုင်း လ၀က အဖွဲ့တွေကို အလှူရှင်အဖွဲ့က မေတ္တာရပ်ခံထားတယ်လို့ အဖွဲ့ရဲ့ တာဝန်ရှိသူတဦးက ပြောပါတယ်။
ဆန်လှူပွဲလာတဲ့လူတွေကို ပြောရဆိုရတာ အခက်အခဲတွေ ရှိတာကြောင့် လုံခြုံရေးအတွက် ဒေသအခြေစိုက် ထိုင်းစစ်တပ်ကို အကူအညီတောင်းခဲ့ရတယ်လို့ အဖွဲ့ရဲ့ တာဝန်ရှိသူတဦးက သတင်းထောက်တွေကို ပြောပါတယ်။
ဒါတောင်မှ ဒီနေ့ အလှူမှာလာတဲ့မြန်မာတွေ ရန်ပွဲဖြစ်လို့ မြန်မာသတင်းထောက်တွေ ၀င်ရောက်ဟန့်တားခဲ့ရပါသေးတယ်။
By Irrawaddy
No comments:
Post a Comment